حكاية ال100

برغم التعب إلي انا فيه و الوجيعة اما باش نحكيلكم إلي صار اليوم ; موش فقط نزولا عند رغبة الجماعة اما خاطر إلي صار اليوم لازم يخلد في تاريخ الراننغ و السايكلينغ و الترايل و كان لزم القفز بالزانة 😣سامحوني المرة هذي مانيش باش نحكي بالسوري خاطر إلي باش نقولو لا يتقال لا بلوغة موليار و لا بلوغة شكسبير و لا حتى بلوغة نجيب محفوظ إلي باش نقولو ما يتقال كان بالفلاقي( بزيادة نقطة فوق ال ق) و الحمد لله ماناعرفش نسب و لا نقول تييييت !!! و الا راني قلتلكم ارتيكل (-18) 😏

اليوم عديت 6 سوايع قاعدة على كرسي و في يدي عصا كان نسيبها نطيح 🙈 6 سوايع 101 كيلوماتر شخت توجعت ضحكت تعبت و بكيت ... اليوم عرفت إلي فما ثلاثة مالناس ماعاش نعطيهم الجنب و لازم نثبت وراهم كل شي! إلي هوما اينشتاين، نيوتن و إسكندر شهلول... الاول قال اي حاجة تطلع لازم بالفيزيك تهبط وانا اليوم طلعت صعدات ما نتفكرش روحي هبطتهم 😠 و الثاني قال كل جسم متحرك تسيبو في منحدر يقدم ! قانون الجاذبية😒 انا اليوم فالهبطة نوخر 😱و الثالث قال "هذي آخر صعدة 😡😡😡"!!!

يمشيشي في بالكم دوليشة وحدة وحدة و ريق شادية و عبد الحليم !!!101 كلم بالبسكلات بديتهم قرسانة كملتهم قرسانة 😨 من مرناق لاوتينا من اوتينا لزيكا و من زيكة لاخر الدنيا و من اخر الدنيا للمرناق ماناجامش نحكي إلي شفتو الكل صدقوني ريت العجب اما فما حاجات نحب نحكيهملكم باش كان انا نهار نسيتهم انتم ما تنساوهمش !نحكيلكم عل المناظر إلي ريتها اليوم (مانيش نحكي عليك يا زاكي!) مناظر عمري ما ننساها جبال و خضار عيون و باراجات و الله بلادنا محلاها اما احنا منشوفوش😍 نحكيلكم عل القرينتة الي حسيتها اليوم و إلي عمري ما حسيتها حتى فالماراطون(الي لتو مسهل ربي و حكيتلكم عليه) اليوم في لحظة كنت فرحانة و نحب نكمل100كلم و اكثر و في لحظة و قفت نبكي و جبدت تاليفوني باش نحط فالقروب "شكون يجي يروح بيا"كان موش عادل قالي "معانا ربي"

و بالحق ربي ما خلاناش و شدينا صحيح و مسلمناش😥في لحظة كانت شمس و نسمة و في لحظة السما ظلامت و الريح زفرت و المطر عطات خيرها ! و احنا على طرف حديد بين سما و جبل 😣 وقتها توجعت و قرست وقتها بكيت اما موش مالبرد و لا مالوجيعة بكيت خاتر حسيت روحي سلمت و انا مانحبش الخسارة 😢 تعاركت مع الريح و مع المطر و كملت 😎

نحكيلكم الوجيعة الي حسيتها في كل صانتي في بدني مالبرد مالكرسي من يديا من ساقايا والي خلاه سكندر كملتو وزارة التجهيز والاسكان 5كيلوماتر كياس محكوك احرش الحكاية هذى الي ما ركبش على بسكلات روت ماينجمش يفهمها 😔

نحكيلكم على زغوان بلاد الخير و القلب الكبير ناس يدها محلولة عايشة بالبركة😍

نحكيلكم على الناس الي مشيت معاهم اليوم مانيش باش نسمي باش ماننسى حد اما وآلله من كيلوماتر الاول للكيلوماتر واحد بعد الميا رغم التعب و الوجايع ...الضحكة و الجو ماتنحاوش الناس كل وقفو معايا و ماخلاونيش نوخر!انا حربية اما حربية بيكم! عرضوا صدورهم(موش للكرطوش🙈) للكلاب باش انا نتعدا صح سالم ...ماخلاوني ناقصة شي و عمي ماجد و بسكلاتو العجيبة بسكلات و رديو و ميكرواند و اسبيراتور...😂زايد مع القلب الكبير 😍 الميات كيلو وفاو و غدوة نعمل 200 و ننساهم اما الي عشتو اليوم عمرو ما يتنسى...

و في الاخر نقلكم حاجة برك

Ne ratez jamais un programme avec Skander Chahloul aussi fou qu'il soit !