GRAINE DE RUNNEUSE

...حلّت عينيها مع الأذان قد قدْ

... فاقت وحدها ما قيّمها حدْ

 ...الحال حال شتا والطقس برِدْ

...قامت 

 ...توضّات و صلاّت و هزّت عينيها و دعات

... و في دعاها ... ما نسات حدْ

...دعات لسيدها تاج راسها ومولى بيتها... الراجل الي فيه حلت عينيها وحلّ  عينيه فيها و كان موش الموت عمرو ما يخليها

...دعات زادا لوليدها لكبدتها وضناها... الي كلا من شبابها ونساها

...بعد ما سهرت و قرّات  و تعبت و جرات ... اختار يمشي و يخلّيها و بجّل الوَسّادَة عليها

...ما نساتش بنيّتها الكعبة الي حيلتها... الي باعت صياغتها و الأرض الّي ورثتها باش كملت زهّزِتها و من ليلة دُخلِتها ...نسات امّيمِتها

...حتّى الكِنّــة و النّسيب عطاتهم من دعاها نصيب... و على قد ما ظلموها و ضرّوها ما خرجت منها كلمة تعيب

...دعات و دعات فاضت دمعتها و بكات . ... كان هوما نساو هي عمرها ما نسات

...تفكّرت الايامات و الوقت الّي فات

...البارح في الأيام كانت طرنكوشة حليلتها... سفساري حرير و خلخال في كعبتها

...البارح في الأيام كانت بكلمتها ... لامّة و ليداتها و صاينة دويرتها

...طلّت مولى بيتها بالدّنيا و ما فيها ... كا نت ممتهنية تضحك من عينيها

...البارح في الأيام كانت عايشة غانمة كانت سالمة

...اليوم دار الزّمان و الزّمان دوار ... لا قعدّلها صغر و لا قعدولها صغار

...اليوم دار الزمان و دارت الايّامات... كاينّها لا جابت لاتعبت لا ربّات

...حياتها اليوم فرش و كسالة ... عين عالباب و عين عالمنقالة

...لا طالبة مال و لا حاجتها بفلوسهم... طالبة يدق الباب و يجيوها و تشوفهم

 

....امّيمتكم مسامحة علي عملتوه فيها... خليتوها احتاجت و مدت ايديها...

...امّيمتكم مرضت و لا من يداويها... يواسيها... حتى يسأل عليها

...ما تقولوش تحطّت ما تقولوش وفات.. خرجت و خدمت و حبّت تستقات 

....انتم ما صنتوها اما ربي صانها

...انتم خنتوها و ذراعها ما خانها

...امّيمتكم بقدرها و الفقر ما يقهرها... امّا الصحة مشات و الوقت غدرها

...ليوم ولاد الكلب استكثرو فيها شقاها لا غزرو لشيبتها و لا تهزّو لبكاها

...في لحظة غدروها و استفعلو فيها... قاومت ماسلّمت و تمكنو بيها

.. تغلبت و فات الفوت... ولاد الكلب هربو و خلاّاوها للموت

 ... و اللّيلة

...غمضت عينيها مع الاذان قد قد  ... شهّدت وحدها ما شهّدلها حد

...ايّ سالمة بكات ... سالمة تقهرت سالمة تظلمت... سالمة هزت عينيها للعالي و دعات... سالمة توفّات

....سامحنا يا امّيمتي و امسحها فينا... والله قلوبنا بكات الدّم و ربي يشهد علينا

...لا نستاهلو سماح و لا تفيد فينا شفاعة... ذنبك في رقبتنا لين تقوم السّاعة

Repose en paix Ommi Selma …

​

Un texte de Sirine BOUBAKER